আমার মানু কাপ আহান কাইলে সেচুরেয়া বেঙ আহান লামতারা

আমার বিষ্ণুপ্রিয়া মণিপুরী গজেদে কাহানি পাহুরিয়া লামানির সিংনাত আসি। এবাকার দশাহান ফালদিয়া কাপ আহান কাইলে সেচুরেয়া বেঙ আহান লামরাং। এগদে আমার মানু ছিটারেয়া থাইলেউ, হৌগদে চাকা চাকা ইয়া আসি। অতার পরেউ তানুর দশা এগোদের মানুরাংত জিঙে আরো সলসে। বিশ্ব জুড়ে চলের জাতর শিংনাত আমিয়ৌ গারগো বরিক এজাত হৎনা দশগো তিলুয়া আমার মানুয়ে নাকরতারা। দশগো তিলুইলে দশানন ইয়া আগরে আগই তাল দিয়া চচানির শিংনাত লামতারা। রাষ্ট্র বিজ্ঞানে ‘জনবলরে’ জবর গুরুত্ব দের। ঔ বল অতা এগোদের মানুরতা নেইলেউ হৌগদের আমার মানুরতা আসে। জনবলর লগে মনোবল, ঐক্য থাইলে কোটি কোটি রূপার ফান্ড হংকরতে লক্ষী গিথানকেউ বাধা দেনার কথা নাবে। বিচারপতি, এমপি, জজ, ডিসি, ম্যাজিস্ট্রেট, এসপি, কর্ণেল, মেজর এবাকা আমার মানুত আসি। কিন্তুমান আমার মানুত ভবিষ্যতে প্রধানমন্ত্রী ইলেউ হারৌপার কোন কারণ নেই। কারণ আমার মানু ফালদিয়া কাপ আহান কাইলে বেঙ আহান সেচুরেয়া লামতারা।

আমার (Bishnupriya Manipuri) সমাজর মানু যত গজে কাহিতারা ততো নিজর জাতহান পাহুরতারা। মানুর জাতর হিরো অনার সিংনা দিতারা-কথাবার্তা, চালচলন, খানাপিনাত। অহান নাইলে যুবকল্যাণর খেলা, মহামেল এতা এবাকাউ করানি পারলা অইস। বাংলাদেশর নগরর অজা দীননাথ গিরকে সমাজর ৭ হান দাবি রাষ্ট্রপতিগোরাংত আদায় করিসিল। আজি ৭০ হাজার মণিপুরীয়েউ ঔ দাবির চুল আহাস আদায় করে নুয়াররাং। এমনকি আদায় করিসে ঔ দাবি অতাউ রা করে নুয়াররাং।

ত্রিপুরাৎ আমার মানুত্ব মন্ত্রীগো ইসিল বেলীরাজা বিমল সিংহ গিরক। আমার ঔ রাখাল রাজা বারো বেয়ক রকেটরে তুখাত করেদিয়া কালাক পেলুইলা য়েকনাপায়। অতার লগে ডেমগোত বাগেদিলা বিশ্বর বিষ্ণুপ্রিয়া মণিপুরীর হপন। বিমল গিরক দৌ ইলেউ আমার ইমার উরেত্ব রাজ্য, রাষ্ট্রর সেবার মানু নুকুল্লা। বিমল গিরকর গরগিথানক বিজয় লক্ষী এপাগাউ এমপিগো। গিথানকে রাজনীতিত লামানির খেলতামে বেয়াপা কল্যাণ সমিতি করিয়া আমার বেয়াপারে জাগেইলো। এবাকা এমপিগো অনার পরে এতাত সময় নাদিরি। উঠেসিলা বেয়াপাউ বারো ঘুমজিলা বুলিয়াউ পৌ পেইলাং। বেলীগো বুরানির পরে থাচির আঁধারে পরিসি আমার সমাজহাত জোলাকহান নুকুলে আহের বুলিয়া হৌগদের মানুয়ে মাততারা।

এমতাগা এমপিগো ইল ধনপতি কার্তিক সেনারেলো এসাদে হপন দেখতারা হৌগদের মানুয়ে। যেগউ মাততারা পয়সা হিচানিত গিরক জবর চৌখাত বুলিয়া। লী গিথানক গিরকর গজে কালাক পেলুইছে বুলিয়াউ মানুয়ে মাততারা। কিন্তুমান সমাজর কোন ডাঙর কামে গিরকে এবাকাউ মিল্লেঙ নাদেসে। কুংগ কুগৌ সমালোচনা করিয়া ‘গজে কায়া তল পাহুরলো’ বুলিয়াউ ওয়াকাত হুনরাং। ভারতর মানু যেসাদে চাকা, চাকা অয়া লাম পরেসি হৌগদে অসাদে চাকালা চাকালা পরথানিতৌ আল নেই তানু। বিমল গিরকরে কতোতাই চুনা নাপেইলা। হারেইলা পরে হারপেইলা। কাদানিয়ৌ কাতলা এবাকা বিজয় লক্ষীরেউ কোনো কোনোগয় দেখে নারতারা। চচেইতারা বিজয় লী, কার্তিকসেনা দ্বগিরেউ। হানতে বিজয় লক্ষী, কার্তিক সেনা দ্বগিয়ৌ খানি শিঙোনা থক এবাকাই।